María Teresa Higueras, da Asociación dos Amigos da Música, os Museos e as Casas-Pazo fixo unha breve exposición sobre a ampla traxectoria de Levin, así como a súa densa formación. Adam Levin, nacido en North Shore, Chicago, é un virtuoso da guitarra e ofreceu concertos nos escenarios máis prestixiosos de USA, Italia, Alemaña e España onde ademais foi profesor de guitarra na Escola Amadeus de Música en Madrid.

Na Casa de Galicia, e dentro do programa previsto interpretou, en palabras do propio Levin, "unha estrea mundial": unha obra de Luis de Pablo, "escrita especialmente para guitarra e que onte mesmo estivemos ensaiando e facendo sobre ela os últimos retoques"; e a do músico galego Octavio Vázquez, afincado en USA, onde coincidiu con el, e "por estar na Casa de Galicia" é como homenaxe a ela. O repertorio ademais incluíu obras de J.S.Bach, Ricardo Llorca, Eduardo Morales e Salvador Brotons.

Tal e como figuraba no programa de man do concerto, Levin, -artista de selo discográfico Naxos-, foi eloxiado polo guitarrista americano de renome, Eliot Fisk, como un "guitarrista virtuoso e un verdadeiro home renacentista do século XXI co brío, a intelixencia, o encanto, a tenacidade e convicción para cambiar o mundo". Levin interpretou nos Estados Unidos e Europa en escenarios prestixiosos como as salas de concerto Pick Staiger de Chicago e Mayne Stage, o Palazzo Chigi Saracini de Italia, o Isabella Stewart Gardner Museo de Boston e o Jordan Hall, o Museum of Fine Arts de Boston, a Universität für Musik und darstellende Künst de Berlín, o Auditorio Axa de Barcelona, e o Pazo de Godoy de Madrid, O Pazo BBVA do Marqués de Salamanca, e a Sala Manuel de Falla.

Recibiu numerosos galardóns de gran prestixio e foi recoñecido pola Society of American Musicians, a Lake Forest Concerto Competition, Schubert Competition de Minesota, Boston GuitarFest, Concurso Internacional de lles Corts para Novos Intérpretes en Barcelona, Concurso Internazionale Di Gargnano, e Certámen Internacional Luys Milan de Guitarra en Valencia.

Tamén foi artista invitado nunha gran variedade de ciclos de música, incluíndo a Sociedade Española de Guitarra, Concertos en Pazos e Festival Clásicos en Verán en Madrid, Amigos da Guitarra de Valencia, Boston GuitarFest, L'Accademia Musicale Chigiana en Siena, e Festival Prol Música e Cultura en St.Moritz.

Ademais, como embaixador da guitarra, Levin está disposto a compartir un repertorio único en zonas desfavorecidas e espazos inusuais. En 2005, como parte dun esforzo por recadar fondos para as vítimas do furacán Katrina, Adam dirixiu o Concert for Gulf-Coast Aid, co que conseguiu reunir $10,000 en donativos. En 2007-2008 foi premiado coa bolsa Albert Schweitzer Fellowship, que consistiu en máis de 200 horas de traballo comunitario en zonas escolares de Boston, refuxios, centros de rehabilitación, e outros centros de persoas necesitadas.